A creatividade tamén se aprende
No departamento financeiro de Danone detectouse un problema: os informes que elaboran periodicamente non se len porque a cantidade de cifras, gráficos e táboas os fan pouco atractivos. Por outro lado, na compañía Gillette, as reunións alongábanse tanto que o tempo de traballo se reducía aos anacos entre reunión e reunión. Que teñen en común ambos os dous problemas? Posiblemente que a súa solución pasa por aplicar medidas creativas e innovadoras. Para conseguilo, «o punto de partida é preguntarse as cousas dun xeito distinto á de sempre, porque se facemos sempre as mesmas preguntas, chegaremos sempre ás mesmas respostas, e así é imposible innovar», explica Philippe Delespesse, socio fundador de Intelixencia Creativa, unha consultora que axuda a xestionar a creatividade das empresas.
En Gillette reduciron o tempo das súas reunións obrigando os participantes a estar de pé
Así o fixeron en Gillette, onde despois de darlle moitas voltas chegaron á conclusión de que as reunións se farían de pé. Esta medida axudoulles a reducir considerablemente o tempo dos encontros, xa que a incomodidade de non se poder sentar lles axuda a centrarse no tema a tratar sen maiores rodeos. Segundo Delespesse, este é un bo exemplo do erro que supón «relacionar a creatividade co produto, o deseño, ou a I+D unicamente, porque a creatividade é un valor transversal de todos os departamentos da compañía».
Joaquim Vila, responsable de innovación do IESE, engade que «as empresas necesitan encontrar solucións orixinais aos problemas tanto novos coma recorrentes. As solucións convencionais no mellor dos casos póñennos ao mesmo nivel que outras empresas similares. Unha solución orixinal, en cambio, dá como resultado unha vantaxe, que terá máis ou menos impacto segundo o valor que achegue, segundo a medida en que se poida protexer de imitacións, e tamén segundo o grao de apoio interno que teña dentro da empresa».
Formación para todos
A formación dos empregados resulta clave para poder chegar a todas estas solucións innovadoras, xa que normalmente a xestión da creatividade é unha materia pendente nas compañías. As formacións son o primeiro paso para convencer a empregados e directivos de que as boas ideas xorden só cando se desbloquea a mente, e cando o ambiente é propicio para dar renda solta á imaxinación. «A partir de aí, a empresa interésase non tan só en xerar ideas, senón tamén en sistematizar estes procesos. Poden crear un equipo cos seus propios formadores en creatividade, para non ter que depender dunha empresa externa, e un comité permante de innovación que se encarge de realizar un seguimento de todas as ideas que xorden no seo da empresa», segundo explica Delespesse.
Unha aposta das grandes compañías
A pesar de que a xestión da creatividade pode achegar grandes beneficios, o investimento económico que supoñen este tipo de servizos son un freo para a pequena e mediana empresa.
O custo dunha formación de dous días para 40 persoas pode roldar os 15.000 euros
Ata agora, as compañías que apostaron por estes métodos son grandes multinacionais ou grupos empresariais como Chupa Chups, Coca Cola, Pepsico, Planeta, Danone ou Matutano, entre outras.
Para facernos unha idea, Una sesión de formación de dous días para un departamento de 40 persoas ten un custo aproximado de 15.000 euros; por 6.000 euros adicionais, tamén se pode formar a un grupo de «formadores» internos da empresa. Pero as cantidades poden ascender aínda moito máis. Intelixencia Creativa recibiu o encargo dunha gran farmaceutica para formar 300 traballadores, nun plan que durará máis dun ano e medio, e que lle custará á empresa un total de 100.000 euros.
A rendibilidade do investimento dependerá do valor das innovacións aplicadas, pero a satisfacción xeral dos participantes, ata o momento, supera de sobra o «notable». En Apli, por exemplo, destacan as 500 ideas que se xeraron grazas a varios talleres de xestión de creatividade, e dende Planeta recoñécese a capacidade efectiva destas técnicas para conseguir resultados a curto prazo.
